3. 𝑴𝒚 𝑭𝒓𝒆𝒔𝒃𝒆𝒆

𝐏𝐚𝐥 𝐏𝐚𝐥 𝐏𝐚𝐥 𝐏𝐚𝐥 𝐇𝐚𝐫 𝐏𝐚𝐥 𝐇𝐚𝐫 𝐏𝐚𝐥

𝐊𝐚𝐢𝐬𝐞 𝐊𝐚𝐭𝐞𝐠𝐚 𝐏𝐚𝐥 𝐇𝐚𝐫 𝐏𝐚𝐥 𝐇𝐚𝐫 𝐏𝐚𝐥

𝐎 𝐇𝐮𝐦𝐬𝐚𝐟𝐚𝐫 𝐋𝐚𝐠𝐭𝐚 𝐇𝐚𝐢𝐧 𝐃𝐚𝐫 𝐑𝐚𝐚𝐭 𝐊𝐚𝐭𝐞 𝐍𝐚 𝐊𝐚𝐛𝐡𝐢𝐞 𝐇𝐨 𝐒𝐞𝐡𝐚𝐫

𝐈𝐬𝐬 𝐏𝐚𝐥 𝐌𝐞𝐢𝐧 𝐒𝐢𝐦𝐭𝐞 𝐔𝐦𝐚𝐫 𝐑𝐚𝐚𝐭 𝐊𝐚𝐭𝐞 𝐍𝐚 𝐊𝐚𝐛𝐡𝐢𝐞 𝐇𝐨 𝐒𝐞𝐡𝐚𝐫

Reyanshi

- Female Lead

- 19 years

Dev

- Male Lead

- 24 years

Kuch rishte introduce nahi kiye jaate.

Woh bas hote hain. Jaise hawa. Jaise saans.

Reyanshi ko Dev ka exact pehla din yaad nahi tha. Shayad woh tab bahut choti thi. Shayad usne us waqt usse sirf "uncle ka beta" maana hoga. Par jab usne yaad rakhna shuru kiya... tab tak Dev already uski duniya ka part ban chuka tha.Woh 7 saal ki thi. Dev 12 ka.

5 saal ka difference hota hai... par bachpan mein woh distance nahi lagta.

Woh bas lagta hai koi hai jo tumse thoda bada hai, aur isliye thoda zyada samajhdaar.

School ka pehla clear memory Reyanshi ko ek hi yaad hai.

Subah ka time. Uske baal do ponytail mein bandhe hue. Bag itna bada ki lagta tha woh bag ko nahi, bag usse carry kar raha hai. Gate ke bahar thoda darr sa. New classes. Bade bachche.

Aur tab peeche se ek familiar awaaz

Chalo, late ho raha hai.

Dev

Woh aake seedha uska bag pakad leta. Strap thoda adjust karta jaise woh uska daily ka kaam ho.

Mujhe aata hai, Reyanshi muh bana kar kehti.

Haan pata hai, par phir bhi, woh shant tone mein jawab deta.

Class tak chhod ke jaata. Door ke paas ruk kar kehta

Theek rehna. Agar kuch ho toh mujhe batana.

Reyanshi hamesha pretend karti ki usse zarurat nahi. Par jaise hi woh mudkar jaata... usse ajeeb sa secure feel hota.

Lunch break mein dono ek hi jagah baithte. Floor par. Wall ke paas.

Dev apna tiffin kholta. Reyanshi ka bhi. Aur bina puchhe usse khilana start kar deta.

Kabhi kabhi woh kehti

Main khud kha sakti hoon.

Par phir bhi muh khol deti.

Dev kabhi complain nahi karta.

Usse bas ye pasand tha ki woh uske paas baithi rahe.

Reyanshi ka gussa alag level ka tha. Agar kisi ne uski pencil li aur wapas nahi ki, toh pehle woh Dev ko daantti.

Tumne roka kyun nahi?

Main kaise rokta jab tum khud ladne gayi thi? Woh halki si hasi ke saath kehta.

Kabhi kabhi woh sach mein usse thappad maar deti. Chota sa. Gusse mein.

Dev sirf shocked face banata

Aaj phir?

Phir woh khud hans padti.

Un dono ki ladai bhi ajeeb th kii. 5 minute mein start. 10 minute mein khatam.

Shaam ko ghar ke bahar cycle chalana. Kabhi cricket. Kabhi ludo. Kabhi bas baithkar clouds dekhna.

Kabhi kabhi Reyanshi road cross karte waqt bina soche uska haath pakad leti.

Dev kabhi haath nahi chodhata.

Usne kabhi yeh nahi kaha ki woh uska protector hai. Par har action mein woh dikh jata tha.

Woh school ke corridor mein round lagata rehta tha. Just to check woh theek hai ya nahi.

Ek din Reyanshi class mein ro rahi thi kyunki teacher ne daant diya tha. Dev ko pata chala toh woh break mein seedha uski class ke bahar khada ho gaya.

Jab woh bahar aayi, usne sirf itna poocha

Kisne rulaya?

Reyanshi ne bas muh bana diya.

Teacher.

Dev ne kuch nahi kaha. Bas uska bag liya aur dheere se bola

Tu strong hai. Itna sa toh kuch bhi nahi.

Woh moment Reyanshi ko baad mein yaad aata tha... kyunki us din pehli baar usse laga tha ki koi hai jo bina judge kiye uske side pe khada hai.

Aur phir... ek din sab badal gaya.

Living room mein bade log serious tone mein baat kar rahe the. Dev chup sa tha. Unke papa ko gaav shift hona tha. Permanent.

Reyanshi ko jab samajh aaya ki Dev jaayega... uska dimaag blank ho gaya.

Tum sach mein jaa rahe ho?

Haan... shayad kuch time ke liye.

Shayad ka matlab hota hai pakka.

Us din Reyanshi ne khana refuse kar diya. Paani tak nahi piya. Room mein jaakar roti rahi.

Dev uske paas aaya. Bed ke edge par baith gaya.

Main phone karunga. Main milne aaunga. Itna bhi door nahi hoon. Par 8-9 saal ki Reyanshi ko sirf ek cheez samajh aayi woh chala jayega.

Uska daily routine toot jayega. Gusse mein, aansuon ke beech, usne kaha

Chale jao. Aaj ke baad mat milna.

Woh line usne bas gusse mein boli. Par Dev ne usse seriously liya.

Agla din subah thoda thanda tha. Hawa mein halki si sardi.

Dev ne doorbell bajayi. Reyanshi ne room ka door band kar liya. Bahar nahi aayi.

Woh bas ek baar awaaz laga kar bola

Apna khayal rakhna.

Aur chala gaya.

Window se Reyanshi ne usse jaate dekha. Usne ek baar mudkar dekha bhi.

Par woh bahar nahi gayi.

Uske baad school ka gate ajeeb lagne laga. Koi bag nahi uthata tha. Koi corridor mein check nahi karta tha.

Lunch break mein tiffin aadha reh jata.

Shaam ko cycle khadi rehti.

Pehle kuch din woh har jagah Dev ko dhoondti. Staircase. Playground. School ke bahar wali gali.

Raat ko takiya geela hota. Phir dheere dheere life normal hone lagi. Bachche adapt kar lete hain. Par kuch khaali jagah kabhi fill nahi hoti.

Kabhi kabhi phone par baat hoti. Awkward si.

Kaise ho?

Theek.

Bas itna.

Saalo baad jab Reyanshi ne writing start ki, sabse pehle jis insaan ko bataya woh Dev tha.

Main stories likh rahi hoon.

Achha? Proud of you.

Simple line. Par us tone mein woh purani warmth thi.

Dev kabhi zyada express nahi karta tha. Par woh hamesha tha.

Aur Reyanshi ko ek baat slowly samajh aayi.

Dev uska sirf bachpan ka dost nahi tha.

Woh uska pehla comfort tha.

Pehla safe space.

Pehla insaan jiske saamne woh bina pretend kiye reh sakti thi.

Param sakha.

Har kisi ko nahi milta.

Aur shayad... har kisi ko samajh bhi nahi aata ki unke paas kya tha.